سياسة الخصوصية

الموقع ده

الموقع ده مابيحطّش كوكيز، ومافيهوش إعلانات ولا أدوات تتبّع ولا تحليلات. الخطوط متخزنة عندنا، فمفيش طلب بيروح لجهة تانية وانت بتتصفح.

الموقع متخزن على Cloudflare، وهي بتشوف عنوان الـ IP بتاعك عشان توصّلك الصفحة، زي أي استضافة.

لما تسجّل دخول

تقدر تدخل لوحة التحكم بحساب جوجل، أو بإيميل وباسورد.

لو بتدخل بجوجل، بناخد منهم اسمك وإيميلك ورقم حسابك عندهم بس، ومابنطلبش أي صلاحية تانية. مابنحتفظش بأي مفتاح دخول من جوجل، فمانقدرش نوصل لحسابك عندهم. وكل مرة تسجّل دخول، الاسم والإيميل بيتحدّثوا من جوجل.

لو بتدخل بإيميل وباسورد، الباسورد مابيتخزنش زي ما هو: بيتخزن بس كـ hash بطيء ومملّح (Argon2id)، فماحدش يقدر يقراه، ولا إحنا.

بنبعتلك إيميلات من no-reply@bosla.shop عن طريق Amazon SES: لينك يخلّص التسجيل ويشتغل يوم، أو لينك تختار بيه باسورد جديد ويشتغل 30 دقيقة ومرة واحدة، أو تنبيه إن الإيميل ده عليه حساب بالفعل. التسجيل مابيعملش حساب غير لما تفتح اللينك.

من طرق الدخول في الإعدادات تقدر تضيف جوجل أو باسورد لحسابك، أو تشيل واحدة منهم. أي طريقة تتضاف بنبعت عنها إيميل لعنوانك، عشان لو حد غيرك ضافها تاخد بالك. ولما تختار باسورد جديد من لينك، بتخرج من أي جهاز تاني.

كل محاولة دخول بإيميل وباسورد، وكل إيميل بنبعته، بنسجّلهم بـ hash للإيميل (SHA-256) مع عنوان الـ IP، عشان نوقف اللي بيجرّب باسوردات أو بيبعت إيميلات كتير.

بيانات مطعمك

بنخزن اللي انت والكاشيرية بتدخّلوه عشان الكاشير ولوحة التحكم يشتغلوا:

• —اسم المطعم والفروع والمنيو والأسعار والإعدادات.
• —أسامي الكاشيرية ودور كل واحد. كود الدخول بيتخزن بطريقة مايتقريش حتى لينا.
• —الطلبات والفواتير والإلغاءات وفتح الدرج، بالوقت واسم اللي عملها. الطلبات مابتتمسحش، لأنها سجل مبيعات مطعمك.
• —وقت كل محاولة دخول بكود على الكاشير وعنوان الـ IP بتاعها، عشان نوقف اللي بيجرّب أكواد.

صفحة مطعمك في الكتالوج

لو نشرت مطعمك، صفحته بتبقى عامة على menu.bosla.shop: اسم المطعم، والمنطقة واللوجو اللي حطيتهم، وأسامي فروعك وعناوينها ومكانها على الخريطة، والمنيو بأسعار كل فرع واللي خلص منه. أي حد يقدر يقراها، ومحركات البحث كمان.

لو شلت النشر، أو الحساب اتوقف، الصفحة بتنزل على طول. ولو غيّرت اللوجو، القديم بيفضل متخزن عندنا.

اللي بيزور الكتالوج مابيسجّلش دخول، ومابنحطّلوش كوكيز، ومابيتخزنش عنه حاجة. الكتالوج متخزن على Cloudflare، وهي بتشوف عنوان الـ IP بتاعه زي أي استضافة. ولو فتح فرع على Google Maps، بيروح لجوجل وبيمشي على شروطهم.

ولما تحط مكان فرعك على الخريطة في لوحة التحكم، الخريطة بتتحمّل من سيرفرات OpenStreetMap.

بيانات زباين المطعم

لما الكاشير يسجّل طلب توصيل، بيتخزن اسم الزبون ورقمه وعنوانه والعلامة المميزة لو اتكتبت، وبيتطبعوا على الفاتورة. الزبون بيتحفظ عشان الكاشير يلاقيه المرة الجاية.

صاحب المطعم يقدر يمسح أي زبون من لوحة التحكم، والطلبات القديمة بتفضل بالعنوان اللي اتطلبت عليه. لو انت زبون مطعم بيستخدم بوصلة وعايز بياناتك تتمسح، كلّم المطعم أو ابعتلنا.

لو وصّلت مساعد ذكاء اصطناعي

تقدر توصّل مساعد ذكاء اصطناعي بحسابك: ChatGPT من OpenAI، أو Claude من Anthropic، أو Gemini من Google. المساعد بيقرا المنيو وبيجهّز تعديلات في المسودة وينشرها باسمك. التوصيل اختياري، ومابيتمش غير لما انت تدخل وتوافق.

اللي بيوصل لمزوّد المساعد هو المنيو بتاعك: الأقسام والأصناف والأسعار والاختيارات والمسودة اللي المساعد بيقراها من بوصلة، واللي انت بتكتبه للمساعد أو بتبعتهوله، زي صورة المنيو الورق. أدوات المساعد في بوصلة بتوصل للمنيو ومسودته بس، فمابيشوفش طلباتك ولا بيانات زباينك ولا كاشيريتك ولا الباسورد بتاعتك.

بنبعت المنيو للمساعد عشان ينفّذ اللي طلبته منه، وعشان كده بس. وبعد ما يوصل لمزوّد المساعد، بيتخزن عنده ويمشي على شروطه وسياسته هو مش بتاعتنا، وهو اللي بيحدد بيحتفظ بيه قد إيه وإزاي تمسحه.

ربط المساعد بحسابك (WorkOS)

بنستخدم WorkOS (شركة WorkOS, Inc.) عشان المساعد يدخل بإذنك: هي اللي بتعرض صفحة موافقتك، وبتدّي المساعد مفتاح دخوله وبتجدّده. بوصلة نفسها مابتصدرش ولا بتخزّن أي مفتاح للمساعد.

لما توصّل مساعد، بنبعت لـ WorkOS رقم حسابك في بوصلة وعنوان دخول بنعمله منه، owner-id@owners.bosla.shop، ومابنبعتلهاش إيميلك أبدًا. WorkOS بتحتفظ بالاتنين كمستخدم ليك عندها، ومعاهم كل مساعد سمحتله. والمساعد نفسه ممكن يعرف رقم الحساب والعنوان ده على الأكتر، مش إيميلك. العنوان ده بيظهر لك في صفحة الموافقة عند WorkOS.

لما تلغي توصيل آخر مساعد، بوصلة بتمسح مستخدمك من WorkOS، وبعدين بتمسح الربط بينه وبين حسابك. وبتتأكد من ده بعد ساعة من كل توصيل، وبعد كل إلغاء تأكده WorkOS. ولو وصّلت وماوافقتش على أي مساعد، بيتمسح بعد ساعة برضه. ولو غيّرت الباسورد من لينك، بيتمسح هو كمان وكل المساعدين بيتفصلوا.

بوصلة بتحتفظ بمعرفة مين مستخدمك عند WorkOS لحد ما يتمسح، وبكل إلغاء توصيل لحد 7 أيام بعد ما WorkOS تأكده، عشان مساعد اتلغى مايرجعش يشتغل. وبتكتب سطر في سجل السيرفر عن كل توصيل وكل إلغاء، وسجلات السيرفر بتتمسح بعد 30 يوم.

تقدر تلغي توصيل أي مساعد في أي وقت من المساعدين المتوصلين في إعدادات بوصلة، وبيبطل يشتغل على طول. وتقدر تطلب من data@bosla.shop نسخة من اللي بوصلة محتفظة بيه عن الربط أو تطلب مسحه. واللي عند مزوّد المساعد بتتحكم فيه من عنده.

لما تسيب بياناتك في إعلان لبوصلة

إعلانات بوصلة على فيسبوك وإنستجرام بتخليك توصلّنا بطريقة من اتنين: فورم تسيب فيه بياناتك عشان نكلّمك، أو زرار بيفتح شات مع فريق بوصلة على الواتساب.

لو بعت الفورم، Meta بتبعتلنا اللي كتبته فيه بس:

• —اسمك ورقم موبايلك.
• —اسم المطعم ومنطقته وعدد فروعه، ودورك فيه، والسيستم اللي بتستخدمه دلوقتي.
• —انهي إعلان بعت منه الفورم، ووقت ما بعته.

ولو كلّمتنا على الواتساب من إعلان، بنحتفظ باسمك ورقمك، وانهي إعلان جيت منه ووقت ما كلّمتنا، واللي بتقولهولنا في الشات عن مطعمك: اسمه ومنطقته وعدد فروعه ودورك فيه.

بنستخدم البيانات دي عشان نكلّمك على الواتساب بخصوص تجربة بوصلة، وعشان نعرف انهي إعلان جاب مطاعم أكتر. مابنرجّعش رقمك لـ Meta، ومابنستخدمهوش في أي إعلان.

بتتخزن على جهاز فريق بوصلة، ورسايل الواتساب بتتخزن على سيرفرنا على Amazon Web Services في فرانكفورت. بتفضل محفوظة لحد ما تطلب مسحها: قولّنا في نفس شات الواتساب، أو ابعت على data@bosla.shop. ولو قلتلنا مش مهتم، مش هنكلّمك تاني.

وMeta نفسها بتشوف الفورم وبتحتفظ بيه حسب سياستها هي، لأنه اتملى على فيسبوك أو إنستجرام، وبتعرف إنك فتحت شات معانا من إعلانها.

الكوكيز في الكاشير ولوحة التحكم

الكاشير ولوحة التحكم بيستخدموا كوكيز للدخول بس، مش للتتبع:

• —تسجيل الدخول بجوجل، أو إضافة جوجل لحسابك: 10 دقايق، وبتتمسح أول ما ترجع من جوجل.
• —دخول صاحب المطعم: 7 أيام.
• —ربط جهاز الكاشير بالفرع: 365 يوم.
• —دخول الكاشير: 12 ساعة، أو المدة اللي المطعم يحددها.

وجهاز الكاشير بيحتفظ بالطلب اللي لسه بيتكتب، عشان مايضيعش لو النت قطع، وباختيار اللغة والشكل.

فين بتتخزن

بيانات بوصلة متخزنة على Amazon Web Services في فرانكفورت بألمانيا. لو وصّلت مساعد، المستخدم بتاعك عند WorkOS (رقم حسابك والعنوان اللي بنعمله منه بس) بيتخزن عندها هي، ومش على سيرفراتنا، والمنيو اللي المساعد بيقراه بيتخزن عند مزوّد المساعد. قاعدة البيانات متشفّرة ومش متاحة على الإنترنت، وكل مطعم بياناته منفصلة: مطعم مايقدرش يشوف بيانات مطعم تاني.

فيه نسخة احتياطية تلقائية نقدر نرجّع منها لأي لحظة في آخر 14 يوم. سجلات السيرفر، ومنها عناوين الـ IP، بتتمسح بعد 30 يوم.

الإيميلات اللي بتتبعت لأي عنوان على bosla.shop، ومنها data@bosla.shop، بتتخزن كاملة هناك برضه، وبتفضل محفوظة لحد ما نمسحها.

مين تاني بيشوفها

مابنبيعش بياناتك، ومابنستخدمهاش في إعلانات. الجهات الوحيدة اللي بتتعامل معاها هي اللي بتشغّل الخدمة: Amazon Web Services للسيرفر وقاعدة البيانات والإيميل، وCloudflare للموقع والكتالوج وملفات الكاشير، وGoogle لتسجيل الدخول لو اخترته، وOpenStreetMap للخريطة في لوحة التحكم. ولو وصّلت مساعد ذكاء اصطناعي، WorkOS بتشغّل الربط، ومزوّد المساعد (OpenAI أو Anthropic أو Google) بيشوف المنيو واللي بتكتبه له. ولو جيت من إعلان لبوصلة، Meta بتشوف الفورم اللي بعته أو الشات اللي فتحته منه، والواتساب بيوصّل الرسايل بينا.

حقك

تقدر تطلب نسخة من بياناتك، أو تصلّح حاجة غلط فيها، أو تطلب مسحها. ابعت الطلب من الإيميل اللي بتسجّل بيه، عشان نتأكد إنه انت.

لو الصفحة دي اتغيّرت

لو غيّرنا حاجة هنا، هنكتب التاريخ الجديد فوق.